Keshegi demalys kúnderi Qyzylorda oblysynyń aýdandarynda 2 mektep, 2 balabaqsha, 2 sporttyq-saýyqtyrý kesheni men mádenıet úıi ashyldy.
Aýdandarǵa jumys sapary aıasynda oblys ákimi Qyrymbek Kósherbaev nysandardyń ashylý rásimine qatysty.
Atap aıtqanda, Qarmaqshy aýdanynda № 183 Ú.Tomanov atyndaǵy orta mektep pen 50 oryndyq «Samal» balabaqshasynyń ashylýy ótti.
«Elbasymyz Nursultan Ábishuly Nazarbaev 2020 jylǵa deıin bilim salysyna qatysty 3 mindet qoıǵan bolatyn: úsh aýysymdyq jáne apattyq mektepterdi joıý jáne 3-6 jastaǵy búldirshinderdi balabaqshamen qamtý. Úsheýin de Qyzylorda oblysy merziminen buryn oryndady. 2015 jyly úsh aýysymdyq mektepterdi túbegeıli joıýǵa qol jetkizdik jáne 3-6 jas aralyǵyndaǵy búldirshinderdi mektepke deıingi tárbıemen qamtamasyz etýdi merziminen buryn 100 paıyzǵa oryndadyq. Munda memlekettik-jekemenshik áriptestikti damytýdyń úlesi basym ekenin aıtý kerek. Búgingi kúni balabaqshalardyń 71 paıyzy memlekettik-jekemenshik negizinde jumys isteıdi», - dedi aımaq basshysy.
Atap óteıik, sońǵy bes jyldyń ózinde Qarmaqshy aýdanynda 4 memlekettik balabaqsha, 3 mektep, 3 aýyldyq klýb, 1 tarıhı ólketaný murajaıy, 3 dárigerlik ambýlatorııa jáne táýligine 250 kelýshige arnalǵan aýdandyq emhananyń qurylysy júrgizilip, halyq ıgiligine berildi. Odan bólek, Tórebaı bı aýyldyq okrýginde balabaqshanyń qurylysy jáne Tóretam kentinde dene shynyqtyrý saýyqtyrý kesheni qurylystary júrgizilýde.
Jańaqorǵan aýdanynda mektep, balabaqsha jáne sporttyq-saýyqtyrý kesheni, al Shıelide Mádenıet úıi men taǵy bir sport kesheni paıdalanýǵa berildi.
Jańaqorǵan aýdanynyń Túgisken aýylynda 140 oryndyq balabaqsha men sporttyq-saýyqtyrý kesheni ashylsa, Qojamberdi aýylynda 200 orynǵa arnalǵan mektep paıdalanýǵa berildi. Bilim uıasynyń burynǵy ǵımaraty 2000 j. asar ádisimen salynǵan.
Bıyl Shıeli aýdany 90 jyldyq mereıtoıyn atap ótpek. Ataýly kúnge oraı aýdanda Mádenıet úıi men sporttyq-saýyqtyrý kesheni ashyldy.
Oblys ákiminiń aıtýynsha, 2013 jyldan bastap aýdanda 6 aýyldyq klýb, Y.Jaqaevtyń týǵan aýylynda mýzeı, tarıhı-ólketaný mýzeıi salyndy. Taǵy da 11 mádenı nysan kúrdeli jóndeýden ótti, al jyl sońyna deıin Tartoǵaı aýyldyq okrýginde 150 oryndyq mádenıet úıi paıdalanýǵa beriletin bolady.
Sońǵy 5 jylda Qyzylorda oblysynda 200 áleýmettik nysan salyndy.